كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ كونستيتۋتسيانىڭ 72-بابىن باسشىلىققا الا وتىرىپ, قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ ماسەلەلەرى رەگلامەنتتەلگەن رەسپۋبليكا كونستيتۋتسياسىنىڭ 41-بابىنىڭ 3-1-تارماعىن رەسمي ءتۇسىندىرۋ تۋرالى ۇندەۋ جولدادى.
قازاقستان رەسپۋبليكاسىنىڭ پرەزيدەنتى – ەلباسى ن.ءا.نازارباەۆقا ۇندەۋ
قۇرمەتتى نۇرسۇلتان ءابىش ۇلى! قازاقستان رەسپۋبليكاسى پارلامەنتىنىڭ سەناتى 2015 جىلعى 14 اقپاندا قازاقستان حالقى اسسامبلەياسىنىڭ كەڭەسى ۇسىنعان كەزەكتەن تىس پرەزيدەنتتىك سايلاۋ وتكىزۋ تۋرالى باستامانى تولىعىمەن قولدايدى. ۋاقىت تالابىنان تۋىنداپ وتىرعان باستاما بارشا حالىقتىڭ قىزۋ قولداۋىنا يە بولىپ, قازاقستاندىق قوعامدا وڭ پىكىرلەر تۋعىزۋدا. حالىقارالىق احۋال شيەلەنىسكەن, الەمدە قاقتىعىستى جاعدايلار تۋىنداعان جانە جاھاندىق ەكونوميكاداعى داعدارىستىق قۇبىلۋلار ورىن الىپ وتىرعان ۋاقىتتا ىشكى ساياسي تۇراقتىلىق قامتاماسىز ەتىلىپ, الەمنىڭ ەڭ دامىعان ەلدەرىنىڭ توبىنا كىرۋ ماقساتىندا ءسىزدىڭ «قازاقستان-2050» ۇزاق مەرزىمدى ستراتەگياڭىزدى, «ماڭگىلىك ەل» تۇجىرىمداماسىن جانە «نۇرلى جول» باعدارلاماسىن تابىستى ىسكە اسىرۋ ءۇشىن قولايلى جاعدايلار جاسالۋى ءتيىس. ءسىزدىڭ دانا ءارى مىقتى كوشباسشىلىعىڭىزدىڭ ارقاسىندا قازاقستان حالقى ەلىمىزدىڭ قالىپتاسۋى مەن دامۋىنداعى بارلىق قيىندىقتاردى ابىرويمەن ەڭسەرە ءبىلدى. ءسىز تاۋەلسىزدىك جىلدارىندا دامىعان نارىقتىق ەكونوميكاسى, حالىقارالىق قوعامداستىقتاعى بەدەلدى ۇستانىمدارى بار تابىستى مەملەكەت قۇرا ءبىلدىڭىز. سوندىقتان دا, قازاقستاندىقتاردىڭ بۇگىنگى تاڭداعى بارلىق جەتىستىكتەرىن: تۇراقتى ەكونوميكالىق ءوسۋدى, دەموكراتيانىڭ دامۋىن, ۇلتارالىق كەلىسىم مەن الەۋمەتتىك يگىلىگىن ءسىزدىڭ ەسىمىڭىزبەن بايلانىستىرۋى زاڭدى. قازاقستان دامۋدىڭ جاڭا ساتىسىنا اياق باسۋدا. وسى ورايدا, بەلگىلەنگەن رەفورمالاردى ودان ءارى جۇرگىزۋگە باعىتتالعان ءسىزدىڭ باعدارىڭىزدى تابىستى جۇزەگە اسىرۋدىڭ ءسوزسىز شارتى بولىپ تابىلاتىن تۇراقتىلىقتىڭ ماڭىزى زور. ءبىز, پارلامەنت سەناتىنىڭ دەپۋتاتتارى, كەزەكتەن تىس پرەزيدەنتتىك سايلاۋ وتكىزۋ ەلىمىزدە بەيبىتشىلىكتى, بىرلىك پەن كەلىسىمدى نىعايتۋعا ىقپال ەتەتىندىگىنە سەنىمدىمىز. اسا قۇرمەتتى نۇرسۇلتان ءابىش ۇلى, سىزدەن قازاقستان حالقى اسسامبلەياسى كەڭەسىنىڭ باستاماسىن قولداپ, كەزەكتەن تىس پرەزيدەنتتىك سايلاۋدى بەلگىلەۋ تۋرالى ماسەلەنى قاراستىرۋىڭىزدى سۇرايمىز. استانا, 2015 جىلعى 19 اقپان.
جاناشىر جۇرەكتەن شىققان تىلەك
پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى قازاقستان حالقى اسسامبلەياسى كەڭەسىنىڭ ۇسىنىسىن مەن دە تولىعىمەن قولدايمىن. اسسامبلەيا – بۇگىندە شىن مانىندە كەڭەسە ويلاسىپ, كەڭىنەن پىشەتىن پاراساتتى ۇيىمعا اينالىپ وتىر. سان الۋان حالىقتىڭ باسى قوسىلعان بۇل ۇيىمنىڭ بىزبەن تىلەگى دە ءبىر, ماقساتى دا ءبىر. پرەزيدەنتتىك سايلاۋدى مەرزىمىنەن بۇرىن وتكىزۋ تۋرالى ولاردىڭ بۇل باستاماسىن دا سونداي جاناشىر جۇرەكتەن شىققان تىلەك دەپ قابىلدادىم. قازىرگى زامان – شاپشاڭ زامان. ونىڭ جىلدامدىعىنا, ەكپىنىنە كوپشىلىگىمىز ىلەسە الماي جاتىرمىز. ال ەلباسىنىڭ جاڭاشىل جىلدامدىعىنا ءىس-ارەكەت تۇگىلى, سانا جاعىنان دا كوش كەيىن قالىپ جاتقانىمىزدى جاسىرمايمىز. سوندىقتان, تاعى قايتالايمىن, مەن بۇل ۇسىنىستى دەر كەزىندە جانە كورەگەندىكپەن جاسالعان باستاما دەپ سانادىم. سەبەبى, كەلەسى جىلى ەكى سايلاۋ – پرەزيدەنتتىك جانە پارلامەنتتىك سايلاۋلار قاتار كەلىپ وتىر. ونىڭ ءوزى قاي جاعىنان بولسا دا – ەكونوميكالىق, ساياسي جاعى بولسىن, ۇلكەن كۇش-جىگەردى تالاپ ەتەدى. سونى القىندىرماي, اپتىقپاي, ەل-جۇرتىمىزدى شارشاتپاي بايىپپەن اتقارۋعا دا بولماس پا! ياعني, كەڭ ۋاقىتتا پرەزيدەنتتىك سايلاۋدى ەرتەرەك وتكىزىپ جىبەرگەن ءجون ەكەنى ءسوزسىز. ەلباسىنىڭ تىنىمسىز قىزمەتىن, ەل دامۋى جولىنداعى ەرەن ەڭبەگىن, حالقىنا دەگەن زور ىقىلاسىن ءبارىمىز جاقسى بىلەمىز. ونىڭ ۇستىنە, ەلباسىنىڭ جىل سايىنعى جولداۋلارىنىڭ بارشاسى – ۇلكەن دانالىقپەن جاسالعان ومىرشەڭ قۇجاتتار. ولار ەلىمىزدىڭ بولاشاق دامۋىن ايقىندايتىن مەملەكەتتىك اۋقىمدى جوبالار مەن باعدارلامالار. سونىڭ ءبىرى – «نۇرلى جول». اتى ايتىپ تۇرعانداي-اق, «نۇرلى جول» دەگەن ءسوزدىڭ ارعى جاعىندا تالاي شارۋا جاتىر. وسى جوبا اياسىندا ەلىمىزدىڭ تۇكپىر-تۇكپىرىن جالعاستىراتىن جولدار سالىنادى. وسىلايشا, داڭعىل اۆتوباندار مەن جاڭادان سالىناتىن جولدار ەلىمىزدىڭ تۇتاستىعى مەن بىرلىگىن ساقتاۋعا جۇمىس ىستەمەك. قازاقتا «جول ازابى – كور ازابى» دەيتىن اتالى ءسوز بار. سول جول ازابىنان قۇتقارۋ, جولداردىڭ ءوزى بىرىمەن-ءبىرى قاتىناسىپ جاتقاندا, ەۋروپا مەن قىتايدى, وڭتۇستىك پەن سولتۇستىكتى, شىعىس پەن باتىستى بۇرىنعىدان دا جاقىنداستىرىپ, الىس جاتقان وڭىرلەردەگى ءوزارا بايلانىستى ارتتىرۋ, اعايىن-تۋىسقانعا بارعاندا داڭعىل جولمەن شارشاماي بارىپ-قايتۋىمىز – بارلىعى حالىق يگىلىگى ءۇشىن جاسالماق دۇنيەلەر. ناتيجەسىندە جول بويىنداعى حالىققا جۇمىس تابىلادى, جۇمىسى بار ادامنىڭ تۇرمىسى دا جاقسارماق. ال «ماڭگىلىك ەل» يدەياسى – بابالارىمىز ىقىلىم زاماننان بەرى اڭساپ كەلە جاتقان ارمانى ەدى عوي! سونىڭ ءبارى بۇگىندە جۇزەگە اسا باستادى. كەزىندە ابىلاي حان: «بار ەدى ءۇش ارمانىم, اتتەگەن-اي, ەل قىلىپ, قالا سالىپ, بىرىكتىرىپ كەتە المادىم», دەپ كوكىرەگى قارس ايىرىلىپ, وكىنىپ كەتكەن ەكەن. بابالاردىڭ سول ارمانى, مىنەكي, بۇگىن ورىندالىپ جاتىر. ارمان بولعان زاماننىڭ كۋاگەرلەرى –سىزدەر مەن بىزدەر باقىتتىمىز. شۇكىر دەيىك, باردى كورە بىلەيىك, قاناعاتشىل بولايىق, وسىعان جەتكىزگەن اللاعا مىڭ دا ءبىر راحمەت دەيىك. سوندىقتان دا, الدا كەلە جاتقان الەمدىك قارجى-ەكونوميكالىق داعدارىستىڭ قىسپاعى كەزىندە, قاۋىپ-قاتەرى مول زاماندا ەلىمىزدىڭ بولاشاعىنىڭ بەرىك, تاۋەلسىزدىگىمىزدىڭ باياندى بولۋىن ەستەن شىعارمايىق. ول ءۇشىن بۇعان دەيىن تالاي سىننان وتكەن, وسى جىلدار بويى ەلىنىڭ اماندىعى, جەرىنىڭ تۇتاستىعى جولىندا ساليقالى دا كورەگەن ساياسات جۇرگىزىپ كەلگەن ەلباسىمىزعا جاڭا ماندات بەرىپ, ىقىلاسپەن سەنىم بىلدىرەيىك.
ءسابيت ورازباەۆ, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى.
سىرتقى بارلاۋ ارداگەرلەرى دە قولدايدى
ءبىز, قازاقستان سىرتقى بارلاۋىنىڭ ارداگەرلەرى, قازاقستان رەسپۋبليكاسى پرەزيدەنتىن مەرزىمىنەن بۇرىن سايلاۋ تۋرالى باستامانى قولدايمىز! الەمدىك قارجى-ەكونوميكالىق داعدارىستىڭ كۇشەيۋى مەن كۇردەلى حالىقارالىق احۋالدىڭ ۋشىعۋى جاعدايىندا كەزەكتەن تىس پرەزيدەنتتىك سايلاۋدىڭ ءوتۋى ۋاقىت تالابىنا سايكەس كەلەدى. تاياۋ شىعىس, سولتۇستىك افريكا مەن اۋعانستان-پاكىستان ايماقتارىندا كۇردەلى احۋالدىڭ كەلەڭسىز تۇردە بەلەڭ الۋى سالدارىنان حالىقارالىق تەرروريزم مەن ءدىني ەكسترەميزم قاتەرلەرىنىڭ ودان ءارى ءورشۋى تۇرعىسىندا وسىنداي شەشىمنىڭ قابىلدانۋى ۋاقىتقا ساي جانە ورىندى جاسالعان قادام بولىپ تابىلادى. بۇل بارلىق قوعامدى بىرىكتىرۋگە سەبەپشى بولۋمەن قاتار, ۇلتتىق قاۋىپسىزدىگىمىزدى قامتاماسىز ەتۋ بويىنشا الدىن الۋ شارالارىن قابىلداۋدى جانە سىرتقى قاتەرلەر مەن تاۋەكەلدەرگە نازارلارىمىزدى ايرىقشا اۋدارۋدى تالاپ ەتەدى. كەزەكتەن تىس وتەتىن پرەزيدەنتتىك سايلاۋ ەلىمىزدىڭ دامۋىنا جاڭا قوسىمشا سەرپىن بەرىپ, «نۇرلى جول – بولاشاققا باستار جول» باعدارلاماسى مەن «قازاقستان-2050» ۇزاق مەرزىمدى ستراتەگياسىن جانە «ماڭگىلىك ەل» يدەيالارىن ءتيىمدى جۇزەگە اسىرۋعا ۇيىتقى بولاتىنى ءسوزسىز. قازاقستان سىرتقى بارلاۋىنىڭ ارداگەرلەرى وتانىمىزدىڭ ورنىقتى دامۋى مەن سەرپىندى ىلگەرىلەۋىنە باعىتتالعان باستامالاردى ارقاشان قولداپ كەلەدى جانە قولداي بەرەدى. قازاقستان رەسپۋبليكاسى پرەزيدەنتىن مەرزىمىنەن بۇرىن سايلاۋ تۋرالى ۇسىنىستىڭ قازاقستاندىقتار تاراپىنان قولداۋعا يە بولاتىنىنا سەنىمدىمىز.
جۇكەن ماردەنوۆ, سىرتقى بارلاۋ ارداگەرى, «گەنەرالدار كەڭەسى» قوعامدىق بىرلەستىگىنىڭ مۇشەسى, وتستاۆكاداعى گەنەرال-مايور.
ورىندى باستاما – حالىقتىڭ قامى
قازاقستان حالقى اسسامبلەياسىنىڭ مۇشەلەرى پارلامەنتتە ورىندى باستاما كوتەرىپ, ۇندەۋ جولدادى. ويتكەنى, كەلەر جىلى كونستيتۋتسيامىزعا سايكەس پرەزيدەنتتىك جانە پارلامەنتتىك سايلاۋلار ءوتۋى ءتيىس. بۇل – كەزەكتى ناۋقان ەمەس, بارلىق حالىق ءۇشىن وتە جاۋاپتى كەزەڭ. ونىڭ ۇستىنە ەكونوميكالىق داعدارىس الەم حالىقتارىن ويلاندىرىپ تۇرعان كەزەڭدە ەكى بىردەي سايلاۋ وتكىزۋ قيىندىق تۋعىزادى. سوندىقتان, ەلباسىمىزدى بيىل سايلاپ الىپ, سەنىم مانداتىن تاپسىرۋىمىز كەرەك. قازاقستاندا تۇراتىن ءارتۇرلى ەتنوس وكىلدەرىنىڭ باسىم كوپشىلىگى ءوز ەلىنەن زورلىقپەن كوشىرىلدى. سوندا باۋىرمال قازاق حالقىنىڭ باۋىرىنان سايا تاپتى. ال مەملەكەت باسشىسى ن.نازارباەۆ ءاربىر ۇلتتىڭ, ۇلىستىڭ قازاقستاندا تەڭ دارەجەدە ءومىر ءسۇرۋىن قامتاماسىز ەتتى, قامقورلىعىن جاساپ كەلەدى. ءار الۋان داعدارىستاردان قازاقستاندى امان-ەسەن الىپ شىعىپ جاتىر. «نۇرلى جول – بولاشاققا باستار جول» مەملەكەتتىك باعدارلاماسى حالقىمىزدىڭ الاڭسىز ءومىر سۇرۋىنە العىشارت جاساۋدا. «بىلتىر ەكونوميكاعا 1 ترلن. تەڭگە بولىنگەنىن تاعى ءبىر ەسكە سالىپ وتكىم كەلەدى. الداعى ءۇش جىلدا 3 ملرد. تەڭگەدەن بولەتىن بولامىز. سونداي-اق, حالىقارالىق قارجى ينستيتۋتتارىنان شامامەن 10 ملرد. تاعى بار. قازاقستان ءۇشىن قانداي قوماقتى قارجى ءبولىنىپ جاتقانىنا نازار اۋدارىڭىزدار. سىزدەردىڭ الدارىڭىزدا وسى قارجىنى يگەرىپ, ەكونوميكاعا باعىتتاۋ سىندى ۇلكەن مىندەت تۇر. ءار ءمينيستردىڭ, ۇكىمەت مۇشەسىنىڭ, قالا نەمەسە وبلىس اكىمدەرىنىڭ جانە ت.ب. الدىنداعى ۇلكەن مىندەت. ەندى ەلەستەتىپ كورىڭىزدەر. وسىنىڭ ءبارىن ۇكىمەت ورتالىقتان باقىلاپ, جۇمىستىڭ توقتاپ قالماۋىن قامتاماسىز ەتۋى كەرەك», دەپ اتاپ ءوتتى مەملەكەت باسشىسى ۇكىمەتتە وتكىزىلگەن كەڭەستە. ياعني, دۇنيەجۇزىندە قانداي قيىنشىلىق بولسا دا ءبىزدىڭ حالىق تارشىلىق كورمەيدى. ونىڭ كەپىلى – مەملەكەت باسشىسى نۇرسۇلتان نازارباەۆ. سوندىقتان دا سايلاۋدى بيىل وتكىزۋ وتە ماڭىزدى. مەملەكەت باسشىسىنا ستراتەگيالىق باعدارلامانى تولىعىمەن ىسكە اسىرۋعا مۇمكىندىك بەرىلگەندىگىن قالايمىز. روزا پاك, №45 مەكتەپ-گيمنازيانىڭ ديرەكتورى, قالالىق ءماسليحاتتىڭ دەپۋتاتى. شىمكەنت.
حالقىمىزعا قاجەت شارا
ءبىزدىڭ ەلباسىمىز نۇرسۇلتان ءابىش ۇلى نازارباەۆ ەل ءۇشىن تۋعان ۇل, حالقىنىڭ قامقورشىسى, تاۋەلسىز قازاقستاننىڭ نەگىزىن قالاۋشى, الەم مويىنداعان ساياساتكەر. دۇنيەجۇزىندە بولىپ جاتقان تۇراقسىزدىق, داعدارىس, ءارتۇرلى شيەلەنىستەردى ەستىپ, كورىپ وتىرعان قازاقستاندىقتار ەگەمەن ەلىمىزدىڭ ساياسي-ەكونوميكالىق, الەۋمەتتىك تۇراقتى دامۋىن تەك ەلباسىنىڭ ەسىمىمەن بايلانىستىرادى. ەسىمدە, 1998 جىلدىڭ كۇزىندە وڭتۇستىك-شىعىس ازيا داعدارىسى كەزەڭىندە دە ءبىز, پارلامەنت دەپۋتاتتارى, ەلباسىنا مەرزىمىنەن بۇرىن پرەزيدەنتتىك سايلاۋ وتكىزۋ تۋرالى ۇسىنىس جاساعانبىز. ول دا ۋاقىت تالابى بولاتىن. سول ءبىر ساياسي شارادان قازاقستان حالقى تەك ۇتىسقا شىقتى. ەلىمىزدىڭ ەكونوميكالىق قارقىندى دامۋى سول جىلداردان باستالعانى بارشامىزعا بەلگىلى. قازىر دە ساياسي تۇرعىدان «ەتەك-جەڭىمىزدى جيىپ», وسىناۋ الەمدىك داعدارىس كەزىندە ەكونوميكالىق ءال-اۋقاتىمىزعا ەرەكشە كوڭىل بولەتىن ءسات تۋىپ وتىر. العا قويىپ وتىرعان ماقساتتارىمىز دا وراسان زور. ولار ەلباسى جاريالاعان «نۇرلى جول», «قازاقستان-2050» باعدارلامالارى, «ماڭگىلىك ەل» يدەياسى. ەندى وسىلاردى جۇزەگە اسىرۋ كەرەك. پرەزيدەنتتىك سايلاۋ – ەلىمىزدىڭ ساياسي تۇراقتىلىعى, حالقىمىزدىڭ بىرلىگى مەن تىرلىگى, ىنتىماعى مەن بەرىكتىگى ءۇشىن قاجەت شارا. سوندىقتان دا, قازاقستاننىڭ تۇڭعىش پرەزيدەنتىنەن قازاقستان حالقى اسسامبلەياسى كەڭەسىنىڭ مەرزىمىنەن بۇرىن پرەزيدەنتتىك سايلاۋ وتكىزۋ تۋرالى ۇسىنىسىنا كەلىسىم بەرۋىن سۇرايمىز.
مۇحامبەت كوپەەۆ, قوعام قايراتكەرى. استانا.
بەيبىت تىرلىگىمىز ءۇشىن كەرەك
قازاقستاندا تۇرىپ جاتقان ۇلتتار مەن ۇلىستاردىڭ بارلىعى دا باقىتتى جاندار دەپ ويلايمىن. تەك مەن ەمەس, ولاردىڭ بارلىعى دا كۇن سايىن تەلەديداردان اينالامىزداعى ەلدەردە بولىپ جاتقان بەرەكەسىزدىكتى كورىپ, ءبىلىپ وتىرىپتى. ءححى عاسىردا بەيبىت تۇرعىنداردىڭ اتىس-شابىستان ازاپ, زارداپ شەگۋى, مەرت بولۋى قانداي اقىلعا سىيادى؟ كۇيزەلگەن ادامدارعا قاراپ, تۇلا بويىڭ شىمىرلايدى. تۇتاس ەل تۇگىل, ءبىر وتباسىندا ءبىر كۇن ۇرىس-كەرىس بولسا, بەرەكە كەتەدى. كەڭقولتىق قازاق حالقى ء«بىر كۇن ۇرىس بولعان ۇيدەن قىرىق كۇن ىرىس كوتەرىلەدى» دەگەن عوي. وتباسىنىڭ بەرەكەسى شاڭىراق يەسىنە بايلانىستى. سونداي-اق, ەلدىڭ قانداي بولۋى دا ەلباسىنا, كوشباسشىعا بايلانىستى. ءبىز قازاقستاندا ەلباسىمىز نۇرسۇلتان نازارباەۆتىڭ كورەگەن, الىستى بولجايتىن ساياساتىنىڭ ارقاسىندا تاتۋ-ءتاتتى ءومىر سۇرۋدەمىز. قازاقستاندا مەرزىمىنەن بۇرىن پرەزيدەنتتىك سايلاۋ وتكىزۋ باستاماسىن قازاقستان حالقى اسسامبلەياسىنىڭ كەڭەسى كوتەردى. مەن ونى قولىمدى كوتەرىپ قولدايمىن. «نۇرلى جول – بولاشاققا باستار جول» جولداۋىندا جانە ودان بۇرىنعى ستراتەگيالاردا ايتىلعان ەلدى دامىتۋ ماسەلەلەرىنىڭ بارلىعىن نۇرسۇلتان ءابىش ۇلى اياقتاۋى ءتيىس. قازىر قارجى-ەكونوميكالىق داعدارىس الەمدى تىقسىرىپ وتىر. ءبىزدىڭ ەلىمىزدە داعدارىسقا قارسى شارالاردىڭ بارلىعى قولمەن قويعانداي جاسالدى. حالىق ەشقانداي اۋىرلىقتى سەزىنىپ وتىرعان جوق. پرەزيدەنت قاي نارسەدەن دە ۇنەمدەۋ, قارجىنى شاشپاۋ ماسەلەسىن ايتتى. بۇگىن ونى اركىم-اق كوڭىلگە ءتۇيىپ, ەتەك-جەڭىن جيناي باستادى. كاسىپورىندار جەرگىلىكتى اتقارۋشى بيلىكپەن مەموراندۋمعا قول قويىپ, جۇمىس ورىندارىن جاپپاۋدى قاراستىرىپ جاتىر. سونىڭ بارلىعى دا, ەڭ الدىمەن, جۇدىرىقتاي جۇمىلعان بىرلىگىمىزدىڭ ارقاسى ەكەن دە. مەرزىمىنەن بۇرىن سايلاۋدىڭ وتكەنى ەلدىڭ بىرلىگىن بۇرىنعىدان دا ارتتىرادى دەپ بىلەمىن.
ەرگاشۆوي حولمەتوۆ, «شارق» تاجىك-وزبەك ەتنومادەني بىرلەستىگىنىڭ پرەزيدەنتى, قازاقستان حالقى اسسامبلەياسىنىڭ مۇشەسى. قوستاناي.
ەلباسى – ەلدىكتىڭ باستى تىرەگى
ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ ءبىر القالى جيىندا: ء«بىر حالىق – بۇل بارلىعىمىز ءۇشىن ورتاق مۇددەلەر. ءبىر ەل – بۇل بارلىعىمىز ءۇشىن ورتاق وتان. ءبىر تاعدىر – بۇل ءبىز بىرگە ءجۇرىپ وتكەن قيىندىقتار مەن جەڭىستەر», دەپ ءبىزدىڭ ەلىمىزدە ۇلتارالىق دوستىق قاتىناستىڭ قانشالىقتى ماڭىزدى ەكەنىن اتاپ كورسەتكەن-ءدى. مىنە, وسىلاي تاتۋلىقتى تىرلىگىمىزدىڭ تىرەگىنە اينالدىرا بىلگەندىكتەن دە كوپۇلتتى مەملەكەتىمىزدە ۇلتتار دوستىعى مەن ەل بىرلىگى بارلىق تابىستارىمىزدىڭ نەگىزىنە اينالىپ وتىر. قازاقستان رەسپۋبليكاسى – كوپۇلتتى مەملەكەت. 17 ميلليون ادامنان اسقان ەلىمىزدىڭ حالقى 130-دان اسا ۇلتتار مەن ۇلىس وكىلدەرىنەن تۇرادى. ولاردىڭ اراسىنداعى تاتۋلىق پەن كەلىسىم ەلىمىز ءۇشىن شەشۋشى مانگە يە. ساياسي تۇراقتىلىقتىڭ دا تۇعىرى سول كەلىسىم مەن تاتۋلىقتا بولعاندىقتان, ەلباسى دا, ەل بيلىگى دە بۇل ماسەلەنى ءجىتى باقىلاۋدا ۇستايدى. اسسامبلەيانىڭ باستى ماقساتى – ساياسي جاعدايلارعا بولجام جاساي وتىرىپ, قوعامدى الاۋىزدىقتان ساقتاۋ. ياعني, ازاماتتارىمىزدى وتانسۇيگىشتىككە تاربيەلەپ, ۇلتارالىق قاتىناستى نىعايتۋ. الپاۋىت ەلدەردىڭ ءوزى ابدىراپ وتىرعان تۇستا, قازاقستان حالقى اسسامبلەياسى تاتۋلىققا ۇيىتقى بولا ءبىلدى. سوندىقتان, قازاقستان حالقى اسسامبلەياسى كەڭەسىنىڭ ۇندەۋىن تولىق قولدايمىن. ويتكەنى, ەلباسى – ەلدىكتىڭ باستى تىرەگى. ءوز باسىم ەلباسىمىزدىڭ توڭىرەگىنە توپتاسۋ – قيىندىقتاردى ەڭسەرۋدىڭ سەنىمدى كەپىلى ەكەنىنە تولىق سەنىمدىمىن. پرەزيدەنت باستامالارىن قولداۋ – ازاماتتىققا سىن.
رامزان ماگومادوۆ, «ۆايناح» چەشەن-ينگۋش ەتنومادەني بىرلەستىگىنىڭ جەتەكشىسى. جامبىل وبلىسى.
